ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި ހަމަނުޖެހުންތަކުގެ ނޭދެވޭ އަސަރު ރާއްޖެއަށް ކުރިމަތިވަމުންދާ މި ދަނޑިވަޅުގައި، ގައުމުގެ މާލީ ހަމަޖެހުން ދަމަހައްޓައި، އިގްތިސާދީ ވިލުންވެރިކަން އިތުރުކުރުމަށް ސަރުކާރުން މުހިންމު ފިޔަވަޅުތަކެއް އަޅަމުންދާ ކަމަށް މާލީ ވަޒީރު ހަސަން ޒަރީރު ވިދާޅުވެއްޖެއެވެ.
ރޮއިޓާސްއަށް ދެއްވި ހާއްސަ ބަސްދީގަތުމެއްގައި ވަޒީރު ޒަރީރު ފާހަގަކުރެއްވި ގޮތުގައި، ދުނިޔޭގެ ބާޒާރުގައި ތެލުގެ އަގު އުފުލުމާއި، ހިނގަމުންދާ ހަނގުރާމަތަކުގެ ސަބަބުން ފަތުރުވެރިކަމަށް އަންނަ ލޮޅުންތައް ފަދަ ބޭރުގެ މާލީ ޕްރެޝަރުތައް މެނޭޖްކުރުމަށް ސަރުކާރުން ދަނީ ހާއްސަ އިސްކަމެއް ދީގެން މަސައްކަތް ކުރަމުންނެވެ. މިފަދަ ގޮންޖެހުންތަކަކީ ދުނިޔޭގެ ގިނަ ގައުމުތަކަކަށް ކުރިމަތިވެފައިވާ ކަންކަން ކަމުގައި ވިޔަސް، ރާއްޖޭގެ އިގްތިސާދީ ރައްކާތެރިކަން ކަށަވަރުކުރުމަށްޓަކައި އިސްނަގައިގެން ހަރުދަނާ ފިޔަވަޅުތަކެއް އެޅުމަކީ ކޮންމެހެން ބޭނުންތެރި ކަމެއް ކަމަށް ވަޒީރު ވިދާޅުވިއެވެ.
މިގޮތުން ދައުލަތުގެ ހަރަދުތައް ކުޑަކުރުމަށާއި މާލީ ނިޒާމު ހަރުދަނާކުރުމަށް ސަރުކާރުން ގިނަ ފިޔަވަޅުތަކެއް އަޅަމުންދާކަން ހާމަކުރައްވައި، ވަޒީރު ވިދާޅުވީ މި މަސައްކަތްތަކުގެ މައިގަނޑު މަގުސަދަކީ ދުނިޔޭގެ އިގްތިސާދީ ނުތަނަވަސްކަމުގެ ނޭދެވޭ އަސަރުތައް ކުޑަކޮށް، ގައުމަށް ދެމެހެއްޓެނިވި އިގްތިސާދީ ކުރިއެރުމެއް ހޯދައިދިނުން ކަމަށެވެ.
އިގްތިސާދީ ގޮންޖެހުންތަކުން އަރައިގަތުމުގައި ބައިނަލްއަގްވާމީ މާލީ އިދާރާތަކުގެ އެއްބާރުލުން ނުހަނު ބޮޑު ދައުރެއް އަދާކުރާކަން ފާހަގަކުރައްވަމުން ވަޒީރު ވިދާޅުވީ، ސަރުކާރުގެ އިގްތިސާދީ އިސްލާހީ ފިޔަވަޅުތަކަށް އެހީތެރިކަން ހޯދުމުގެ ގޮތުން ވޯލްޑް ބޭންކާއި އެހެނިހެން މާލީ އިދާރާތަކާ އެކު ފުޅާ ދާއިރާއެއްގައި މަޝްވަރާތައް ކުރިއަށްދާ ކަމަށެވެ.
ކުރިއަށް އޮތް ތަނުގައި ރާއްޖޭގެ އިގްތިސާދު ކުރިއަރާނެ ކަމަށް ލަފާކުރެވޭ މިންވަރަށް ބަލާއިރު، 2027 ވަނަ އަހަރު ރާއްޖޭގެ އިގްތިސާދު 3.8 އިންސައްތައިގައި އަދި 2028 ވަނަ އަހަރު 6.8 އިންސައްތައިގައި ކުރިއަރާނެ ކަމަށް ސަރުކާރުން ލަފާކުރެއެވެ. ސަރުކާރުން އިގްތިސާދީ ގޮތުން އެންމެ އިސްކަންދޭ ދާއިރާތަކުގެ ތެރޭގައި އިގްތިސާދު ސިންދަފާތުކުރުމާއި، ފަތުރުވެރިކަމުގެ ސިނާއަތު އިތުރަށް ހަރުދަނާކުރުމުގެ އިތުރުން، 2028 ވަނަ އަހަރާ ހަމައަށް އިއާދަކުރަނިވި ހަކަތައިގެ އިންވެސްޓްމަންޓްތައް 33 އިންސައްތައަށް އިތުރުކުރުން ހިމެނެއެވެ.


