މެދުއިރުމަތީގައި ހިނގަމުންދާ ހަނގުރާމައިގެ ތެރެއިން ދުނިޔެއަށް ގޭހާއި ތެޔޮ ބޭރުކުރުމަށް ބޭނުންކުރާ އެންމެ މުހިއްމު ކަނޑުގެ ރާސްތާކަމަށްވާ ހޮރްމުޒް ކަނޑުއޮޅި ބަންދުކުރުމާ ގުޅިގެން ތެލާއި ގޭހާއި އެނޫންވެސް އަސާސީ މުދަލަށް ނުޖެހި ކާރިސާގެ ތެރެއިން އަރައިގަނެވުނީ ސަރުކާރުގެ ރޭވުންތެރިކަމުގެ ސަބަބުންކަމަށް އިގުތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
އިދިކޮޅު އެމްޑީޕީގެ މަޖިލިސް މެންބަރުން ސައީދުގެ އިތުބާރު ނެތްކަމުގެ ވޯޓު ނެގުމަށް މަޖިލީހަށް ހުށަހަޅާފައިވާ މައްސަލާގައި ހިމެނޭ ނުކުތާތަަކަށް ޖަވާބުދާރީވެވަޑައިގަންނަވަމުން، ސަރުކާރަށް މާލޭ ވިޔަފާރި ބަނދަރު ނުބެލެހެއްޓުމުގެ ސަބަބުން މުދަލުގެ އަގުބޮޑުވަމުންދާކަމަށް އެ މައްސަލާގައި ހިމަނާފައިވާ ނުކުތާއަށް އަލިއަޅުވައިލައްވަމުން ވަޒީރު ވިދާޅުވީ މާލޭގެ ވިޔަފާރި ބަނދަރަށް ސާޅީހަކަށް އަހަރުވީއިރު، ރާއްޖޭގެ އިގުތިސާދު ފުޅާވަމުން އަންނަކަން އެނގިތިބެ އެ ބަނދަރު ބޮޑުކުރުމަށް އެއްވެސް ސަރުކާރަކުން ކުރި ކަމެއް ނެތް ކަމަށެވެ.
ވަޒީރު އިތުރަށް ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަރަށް ބޮޑު އިސްކަމެއް ދެއްވައިގެން ބަނދަރު ތިލަފުއްޓަށް ބަދަލުކުރުމުގެ މަސައްކަތް ހަލުއިކަމާއެކު މިހާރު ކުރިއަށްދާކަމަށެވެ. އަދި އެއީ ސަރުކާރުން މައްސަލަތައް ހައްލުކުރުމަށް ގެންގުޅޭ ޕޮލިސީ އިންޓަވެންޝަން ނުވަތަ ސިޔާސަތުތަކުގެ ތެރެއިން ތަދައްހުލުވުމުގެ އުސޫލުގެ ތެރެއިން ކުރެވޭ މަސައްކަތެއް ކަމަށެވެ.
ހޮރްމުޒް ކަނޑުއޮޅި ބަންދުކުރުމުގެ ސަބަބުން މި ސަރަހައްދުގެ ވަރަށް ގިނަ ގައުމުތަކުގައި ތެލާއި ގޭސް ލިބުމުގައި ބޮޑެތި ދަތިތައް ކުރިމަތިވެގެންދިޔަކަން ފާހަގަކުރައްވައި ވަޒީރު ވިދާޅުވީ ރާއްޖޭގެ ރައްޔިތުންނަށް ތެލާއި ގޭސް ލިބުމުގައި ދަތިކަމެއް ކުރިމަތިނުވާ ކަމަށެވެ. ސަބަބެއްގެ ގޮތުގައި އޭނާ ފާހަގަކުރެއްވީ ހަނގުރާމަ ފެށުމާއެކު، ރައީސް އެކުލަވައިލެއްވި ވަަޒީރުންގެ ކޮމިޓީން ކުރި މަސައްކަތެވެ.
މުދަލުގެ އަގު އުފުލުނަނުދީ ހިފަހެއްޓުމަށް ސަރުކާރުން ކުރާ މަސައްކަތްތަކަށް އަލިއަޅުވައިލައްވަމުން ވަޒީރު ވިދާޅުވީ އޭނާ ގެންދަވަނީ ރާއްޖެއަށް މުދާ އިމްޕޯޓުކުރާ ފަރާތްތަކާ ވަރަށް ގާތުން މަޝްވަރާކުރައްވައިގެން މަސައްކަތް ކުރައްވަމުން ކަމަށެވެ. އެގޮތުން ބާޒާރުން މުދަލެއް ހުސްވެދާނެކަމުގެ ނިޝާންތައް ފެނިވަޑައިގަންނަވާ ހާލަތުގައި އެ މުދަލުގެ ޝިޕްމެންޓުތައް އަވަހަށް ކްލިއާކޮށް ބާޒާރަށް ނެރެވޭނެ މަގުތައް ފަހިކޮށްދެއްވާ ކަމަށް ވިދާޅުވިއެވެ.



