ގައުމުގެ މިނިވަންކަމާއި ސިޔާދަތަށް އަސަރުނުކުރާ އަދި ގައުމުގެ ސިޔާދަތަށް އުނިކަން ނާންނާނެ ގޮތަށް، މުޅި ޤައުމުގެ މާލިއްޔަތަށް ފައިދާކުރާނެފަދަ އިންގިލާބީ ބަދަލުތަކާ ކުރިމަތިލާންޖެހޭކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ތާރީޚު ހެކިދޭ ގޮތުގައި ރާއްޖޭގެ މިނިވަންކަން ނަގާލުމަށް މިހާތަނަށް ދިން ކޮންމެ ހަމަލާއެއްގެ ފަހަތުގައި ތިބީ ވެރިކަމުގެ ދަހިވެތިކަމުގައި ތިބި ދިވެހިންތަކެއް ކަމަށާއި އެ ހަމަލާތަކުގައި ޝަހީދުވި ބޭފުޅުން ޝަހީދުވީ ޤައުމަށް ދެރަގޮތްވާން ބޭނުން ނުވާތީ ކަމަށެވެ. އެއިން ކޮންމެ ޝަހީދަކު އިސްކުރެއްވީ މި ވަޠަނާއި ޤައުމުގެ މިނިވަންކަމާއި މުސްތަގުބަލުގެ ތަރައްގީއާއި ކުރިއެރުން ކަމަށްވެސް އެމަނިކުފާނު ވިދާޅުވިއެވެ.
ޤައުމަށް ވަފާތެރިވުމުގެ ނަތީޖާ އަބަދުވެސް ބާއްޖަވެރިވާނެކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ މި ޒަމާނަށް ވިސްނާއިރު ޤައުމުގެ އަމިއްލަ ބަސް ބުނެ ދީނާއި އަމިއްލަ ގޮތް ރައްކާތެރިކުރެވެނީ އިގްތިސާދީ މިނިވަންކަން ލިބިގެން ކަމަށެވެ. އެގޮތުން، މިއަދު ޤައުމާ މެދު ފިކުރު ހިންގާއިރު ކާބަފައިން، ހަތިޔާރުގެ އަޅުވެތިކަމުން ޤައުމު މިނިވަން ކުރުވިފަދައިން ދަރަނީގެ އަޅުވެތިކަމުން ޤައުމު މިނިވަންކުރަންޖެހޭ ކަމަށް ވިދާޅުވިއެވެ.
"ތަރައްޤީއަކީ ދިވެހި ކޮންމެ ފަރުދެއްގެ ޙައްޤެއް. ކުރިއަރައި ދިޔުމަކީ ދިވެހި ޤައުމުގެ ޢިއްޒަތާއި ކަރާމާތް އުފުލިގެންދާނެކަމެއް. އެއީ ޤައުމަށް ހެޔޮ އެދޭ ކޮންމެ ދިވެއްސެއްގެ އުންމީދު. ކޮންމެ ދިވެއްސެއްގެ ހިތުގެ ދުޢާ،" ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ އެމަނިކުފާނު ޤައުމަށް ތަރައްގީ ގެންނެވި ނަމަވެސް ޤައުމީ އެއްވެސް ރުކުނަކަށް އުނިކަމެއް އަޔަނުދެއްވާނެ ކަމަށެވެ.




