ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބޭއްވި ކޮންގްރެސް ނިމުނުއިރު 2028 ވަަނަ އަހަރުގެ ރިޔާސީ އިންތިހާބަށް ކެމްޕެއިން ޓީމް އެކުލަވާލެވިފައިވާ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
ޕީއެންސީގެ ކޮންގްރެސް އިންތިޒާމް ކުރުމުގައި ބައިވެރިވި މެންބަރުންނަށް ޝުކުރު އަދާކުރަން އެ ޕާޓީގެ އޮފީހުގައި މިރޭ ބޭއްވި ހަފުލާއެއްގައި އަބްދުއްރަހީމް ވިދާޅުވީ ރައީސް ޑރ. މުހައްމަދު މުއިއްޒަށް 2028 ވަަނަ އަހަރުގެ ރިޔާސީ އިންތިހާބު ފަސޭހަކަމާ އެކު ކާމިޔާބުކޮށްދެވޭނެކަން، ކޮންގްރެސް ނިންމާލެވުމުން ޔަގީންވެފައިވާ ކަމަށެެވެ. އަދި ކޮންގްރެސްގައި މަސައްކަތްކުރި ފޯރީގައި މަސައްކަތްކޮށްފިނަމަ ރިޔާސީ އިންތިހާބު ފަސޭހަކަމާ އެކު ކާމިޔާބުކުރެވޭނެކަން ޔަގީންވާ ކަމަށް އެމަނިކުފާނު ވިދާޅުވި އެވެ.
"މަތީ މަޖިލިސް ނިމިގެން ދިޔައިރު މިއޮތީ އަޅުގަނޑުމެންގެ 2028 ގެ ކެމްޕެއިން ޓީމް ވަރަށް ރަނގަޅަށް ތަރުތީބުކުރެވިފައި. މިއީ މިހާތަނަށް ރާއްޖޭގައި ބޭއްވުނު އެންމެ ކާމިޔާބު، އެންމެ ފުރިހަމަ، އެންމެ އިންތިޒާމުތައް ރަނގަޅު އެންމެ ބޮޑު ކޮންގްރެެސް ނުވަތަ މަތީ މަޖިލިސް،" އަބްދުއްރަހީމް ވިދާޅުވި އެވެ.
ޕީއެންސީގެ މެމްބަރުންނަށް އަބްދުއްރަހީމް ގޮވާލެއްވީ ކޮންގްރެސްގައި އުފެދުނު ޕާޓީ ރޫހުގައި އެންމެ ސިކުންތެއް ވެސް ނަގާ ނުލައި 2028 ގެ އިންތިހާބަށް މަސައްކަތް ފެށުމަށެވެ. ޕީއެންސީގެ ކޮންގްރެސްގައި އެ ޕާޓީން ވަނީ 2028 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމަށް އެޕާޓީގެ ރިޔާސީ ޓިކެޓް ރައީސަށް އަރުވައިފަ އެވެ. އަދި އެމަނިކުފާނަށް ޓިކެޓް ދޭން ނިންމީ އެކަމަށް ހުށަހެޅި ގަރާރަށް ނެގި ވޯޓުގައި ބައިވެރިިވި 1،119 މެންބަރުންގެ އިއްތިފާގުންނެވެ.





